做生意跟玩facebook一樣，有人覺得難，有人覺得易，若然好似某特首候選人識upload相和「打卡」就滿足，當然可以笑住話：「原來唔係好難啫！」玩facebook有高低手之分，做生意亦然。
但無論你幾有營商頭腦，有些生意一開始已注定辛苦。早前看到759阿信屋最新財政報告蝕近3,000萬的消息，再想起老闆林偉駿先生曾說為業績勞心勞力日瞓四粒鐘，即時有以上想法。當然我極為佩服像林老闆這樣的創業者和守業者，其毅力及魄力實屬萬中無一。如用運動比喻，創業等如短跑，守業則是馬拉松，林老闆兩項皆能。本人hea底，喜歡短跑一段，待生意上軌道後只久不久修訂一下對策，再根據我的生意四大法則開展另一盤有協同效應的生意。
一般人覺得在生意上取得成功和財富，便可得到快樂和更多選擇權，其實未必，有些生意越做，只會令你越身不由己，例如現在流行的日韓時裝藥妝、英美加澳代購等網上商店，這等入場門欖低競爭大工序繁複兼利潤不高的小生意，基於人手有限，更多是一人公司，越多訂單只會做死老闆自己，淨係包貨都包到你手軟啦！
很多創業人士心懷一個夢想，就是請多些人砌大盤生意，繼而下放權力，自己印印腳等收錢，我可以告訴你「發夢冇咁早」！香港初創企業GoGoVan，4年間由一間只有5個創辦人的公司，發展到全球擁有約400名員工的規模，很多人以為成功創建平台，就等如擁有一隻會生金蛋的雞，眼見GoGoVan先後獲過億港元融資，連阿里巴巴都睇中，怎不流晒口水?!
現實是這些錢並不入老闆袋，而是應投資者的期望，用於拓展其他國家如中國、新加坡、韓國、台灣、印度等市場，數年間5位年輕老闆穿洲過省投入開發工程，既要了解不同地域的貨運物流文化，亦要解決各地人事管理問題，絕談不上「Hea富」。又好似759，分店接近270間，員工約2,700人，但幾叠友都冇用，林老闆放心不下，連訂貨、船期等鎖事都要親自監督，他的解釋是：「正常老闆都係咁，唔會有幾時放假嘅諗法，自己嘢都唔着緊，咁點做？」大家有睇《三國演義》，應該記得諸葛亮為何早逝。
聽得多生意朋友說：「咁大棚夥計，我唔食，佢哋都要食啦！」賺錢還好，蝕錢卻不可能立刻關門止蝕，捱住再諗出路是唯一方法。如果生意毛利太低或行業進入結構性不景氣，輸掉之前賺的再嘔凸亦比比皆是。你可以說我無大志，我的理念是賺錢買自由，只會做成功後不辛苦的生意。今時今日，選特首要識玩facebook，做生意要知道幾時縮。
《Hea富學》作者
郭釗
http://www.fb.com/heaology.edu