肝臟專家駱淑芳、前特殊學校校長鮑瑞美、酒店業商人李達三，呢三人究竟有乜共通點？答案係，佢哋好快做「校友」！港大噚日公佈，會喺第197屆學位頒授典禮頒發「名譽科學博士」畀駱淑芳、「名譽社會科學博士」畀鮑瑞美同李達三，感謝三人對社會嘅貢獻。
港大話，名譽博士只係頒畀對大學、社會或學術方面有傑出建樹嘅人，咁八方相信三位都當之無愧，好似駱淑芳教授就專研肝炎同肝臟疾病，令醫學界更了解乙型及丙型肝炎演變。鮑瑞美校長多年來亦落手落腳，為聽障兒童嘅特殊教育工作籌款，培訓教師。
至於李達三，除咗係商人，其實都係大慈善家，單睇佢多年嚟捐唔少錢畀各大專院校，成立獎學金或興建新設施，就明佢喺教育界嘅付出啦？望住份名單，八方相信今次都冇乜差錯，至少，唔會好似上年頒畀梁愛詩咁有爭議啩？