建制派成日鬧民主派開會時濫用程序，不過人稱元秋嘅民建聯蔣麗芸噚日就認真示範咩叫做「濫用程序」。話說噚日立法會就施政報告致謝動議辯論，講到下午5時左右，元秋忽然彈起身提規程問題，當時代主席係身兼內會副主席嘅公民黨郭榮鏗（Dennis）。
郭榮鏗話畀溫暖
到底咩事咁緊要需要喺會議期間提出？原來一向中氣十足嘅元秋話會議室冷氣太凍，要求提高溫度，郭榮鏗話會處理。
之後元秋喺走廊見到Dennis，再一次「反映」，話會議室得19度，為咗證明自己真係好凍，仲伸手摸咗對方塊臉一吓，好在Dennis處變不驚，仲識講笑問「使唔使畀啲溫暖你？」
最重要係，元秋呢個「規程問題」將記錄在立會會議逐字記錄入面，可以長存史冊，後世都會知元秋叫主席關冷氣！