告東尼無論做騎師抑或做練馬師，都炮製過唔少經典馬匹，至今仍為人津津樂道。呢位馬壇傳奇人物應澳洲維多利亞賽馬會邀請，將於周六（18日）身處澳洲費明頓馬場，以嘉賓身份出席一年一度閃電錦標賽馬日。
一場去到澳洲，告仔當然會順道探望一下，為佢攞過唔少榮譽的舊戰友、現時住在Living Legend牧場的「加州萬里」、「牛精福星」同埋暫時後無來者的17連勝名宿「精英大師」，告仔仲同佢哋影咗幾張相留念㖭。
告仔話上次探「精英大師」已經係五年前，佢好高興見到呢位老朋友生活得好開心，仲笑言以前自己於「精英大師」心目中的地位遠不及一條紅蘿蔔。
當提到「精英大師」於05年1600米冠軍一哩賽敗於「牛精福星」，無法完成18連勝時，佢坦然當時感到唔開心。
其後當地傳媒問到告仔覺得17連勝的「精英大師」，係咪勁過25戰不敗的澳洲前短途馬后「魚子精華」，佢以賣口讚花香的口脗讚揚「精英大師」。講到尾，呢對成長於不同地域的一代名駒從未試過同場較量，好難話邊隻好過邊隻囉！