銀行興搞數碼化，中銀香港（2388）亦跟潮流，喺中環分行門口放咗個機械人「RoBOC」，負責答客戶簡單問題。如果大家排隊排得耐，都可以叫佢跳part開心舞娛樂吓。
RoBOC識聽廣東話、普通話同英文，理論上問恒指市況、外匯、定期存款利率等等，佢都有能力答到。不過，噚日華華實測過，RoBOC似乎有啲撞聾，成日聽錯人問乜，都係搞笑居多。
好似問佢恒指收幾點，佢就答咗分行營業時間，要華華大聲清楚講「恒生指數」先成功答啱，而且要等成10秒佢先有反應，反而表演跳舞就幾過癮。目前RoBOC只此中環分行一家陪大家。
另外，呢間分行仲可以用指靜脈生物認證服務，即係透過每個人手指嘅獨有脈搏，代替簽名同密碼，幾high tech㗎。