每個人心中都有一個金庸角色，楊過癡情、李莫愁怨恨、喬峰俠義，仲有韋小寶嘅風流，無論成長於哪一個年代，有華人嘅地方就有金庸小說。籌備將近3年、香港首個「金庸館」終於喺下月1日開幕。金庸館設喺香港文化博物館，佔地2,000平方呎，將展出過百組珍藏品，包括金庸早期小說版本、手稿、文獻同照片，讓公眾從中窺探查良鏞（金庸）嘅武俠世界同創作歷程。
為配合金庸館開幕，香港文化博物館下月5日會舉行「金庸其人與故事交流會」，邀請與金庸相交甚深嘅資深傳媒人陶傑和李純恩，分享同金庸嘅相交點滴，亦會剖析佢筆下嘅武俠世界、人文精神同藝術創作等，金庸迷或許可從多一個角度去認識呢位文壇巨匠鮮為人知嘅一面。
交流會名額300
交流會將於下月5日下午3時至4時30分在香港文化博物館一樓劇院舉行，名額300個，先到先得。有興趣者可致電2180 8260報名。除交流會外，由本地漫畫家李志清策劃「繪畫．金庸」專題展覽亦會由下月1日至27日舉行，由不同畫家塑造心中嘅金庸武俠世界，透過畫作呈現給公眾。