研習洪拳嘅特首參選人曾俊華噚日接受《南華早報》嘅facebook live訪問時，主持人突然問佢，點解曾俊華咁喜歡功夫，又為官咁耐，但香港卻冇以李小龍命名嘅街道，曾俊華話，如果以「李小龍」命名街道一定會好受歡迎，自己都鍾意呢個諗法，若有幸當選，會認真考慮一下呢個建議。
成日都有人話今次特首選舉係兩害取其輕，英文就係「The lesser of two evils」，噚日《南早》就問佢，覺得自己係咪evil，曾俊華好果斷話，自己絕對唔係evil。佢又指自己今次個選舉logo，話如果最終贏咗，有人建議佢加兩隻眼（或者兩撇鬍鬚）喺兩座獅子山上喎。
放假論寸林鄭 拒講梁「壞話」
林鄭喺介紹自己本小冊子，第一項就話自己「愛周末上班」，曾俊華有冇咁癲先？曾俊華好坦白話，放假就放假，周末放假佢較鍾意同家人一齊、打劍，但仍會花少少時間兼顧吓工作，又話平日早上六時已起身，做到晚上八、九點，所以的確係需要休息時間。
曾經話過you always agree with your boss，咁佢同以前個老細梁振英關係係點，曾俊華話，自己同梁振英係professional relationship（專業關係），但係自己一向都唔講人壞話，所以唔想多講同梁振英嘅關係。
李八方