啟德由飛機場變成一個大地盤，所以呢排賣樓嘅發展商都不謀而合咁加入飛機元素，好似嘉華個新盤，售樓處擺咗幾件飛機零件整嘅家具不特止，早排佢哋公司又贊助咗國泰機師鄭楚衡嘅首架本土裝嵌小型飛機「香港起飛」嘅環球之旅。
嘉華香港地產總經理溫偉明噚日着埋機師外套、戴住黑超，扮晒Captain Cool講番贊助件事，「佢（鄭楚衡）個精神好值得我哋支持……希望佢真係做到香港人夢想」。同時，香港起飛口號係Inspiration，同公司理念一致，所以管理層決定幫佢一把，贊助「香港起飛」起飛。但問到贊助費幾錢，Captain溫就點都唔肯講嘞。
除咗售樓廠入面會播關於香港起飛嘅片之外，嘉華仲整咗啲香港起飛嘅模型做樓盤宣傳品㖭呀。