之前本欄曾叫人減貨食糊，但面對噚日H股指數進一步超買，恒指升到二萬四關口，主板成交大到1,100億，指數波幅亦開始大，理論更似見頂訊號，證據話你聽再減倉至低水平，先係理智決定。不過與此同時，股份升勢唔算非常全面，市面上唔少聲音話要減貨，相反理論之下，冇理由同主流市場意見坐同一條船，係曲線話畀你聽人哋沽、你就要揸，咁最終應該掟定唔掟？
小弟愚見，喺升市途中，如果見頂訊號同證據唔夠充份，揸！點都要有貨揸住！相反，跌市途中，如果見底訊號同證據唔夠充份，咪撈！呢種思維要時刻緊記。當然，持貨多與少，就要視乎對後市信心而定。
噚日升市同過往中線升浪見頂日比較，有一個唔同之處，就係下晝二三線股沽得急急哋，但又唔係鬥快沽貨走佬嗰隻，而係有晒exit位畀你，即市升完再跌，回穩一兩個鐘畀你慢慢考慮沽唔沽，呢一兩個鐘內諗完至沽都得？個價又未至於好差，個棚仲大到可供一lot貨隨時輕易沽出，真係好沽到一個點……有啲古怪，至少話畀大家聽，情緒未至於極端亢奮，又不是急轉直下。咁忍一日又會點？如果美股升到唔曉停，第二日返嚟港股又有驚喜，手上持股又贏多日。喺壓力之下，小弟選擇……揸多日，就咁忍咗成個下晝，如果真的博啱，過千億成交都仲有得上，往後升市當然不得了。
前日收市後，華虹半導體（1347）公佈第四季收入按年勁升39.2%，純利升83.1%，刺激股價噚日大陽燭爆升6%，成交4,696萬元係近一年最活躍，證明有新資金搶貨。近期有好消息兼有re-rate條件嘅股票，資金點都唔會放過，唔會升一日咁少，呢一刻仍追得過。
晉佳
http://fb.com/advanceguy1