林鄭月娥老公林兆波噚日俾幾家傳媒、喺林鄭現時入住嘅灣仔會景閣樓下撞到正，大家梗係追住佢問，佢封「一國兩制」情書係咪佢寫啦！兆波一聽到啲問題，即時停五秒，唔知佢諗乜諗咁耐，最後都係認咗：「我簽得名，梗係我寫啦」。曾經話希望同太太林鄭過番啲拍拖嘅日子，但林太走去選特首有冇唔開心，兆波有口難言，靜默咗兩秒先話，「呢個隨遇而安。」
一頭稀疏白髮嘅林兆波，噚日雖然未有林鄭同佢同行，但一見到傳媒，佢起初尚算淡定，停低答問題，話自己唔只係百分百支持林鄭，而係無限量支持。兆波喺「一國兩制」嘅情書話，本來預林鄭做埋呢年，就可以同佢重溫新婚初期嘅甜蜜滋味，點知老婆決定選特首，林兆波即時支吾以對，停頓咗兩秒，眼神帶點欷歔話：「唔緊要啦，呢個隨遇而安啦。」當被問到點樣同林鄭慶祝情人節，林兆波就話對方好忙㗎。娶着個女強人，低調嘅兆波無言以對，正常不過。
自稱儀容唔好
一被問到點睇林鄭獲中央力撐，兆波開始唔想答兼想走人，話自己唔清楚亦都唔理呢啲嘢。何解唔走到幕前幫老婆助選？林兆波話因為自己儀容唔好。咁佢有冇咩橋彈畀林鄭，林兆波邊行邊走話：「我唔識呢啲嘢㗎，我淨係識純數㗎咋，其他乜都唔識。」
記者嘅追問開始令兆波招架唔住，兆波唔係好打得，惟有請傳媒放過佢：「夠喇，夠喇，我係普通人嚟㗎咋，放過我啦。」林兆波之後急急腳，返回會景閣。
李八方