有關TVB（511）的新聞，近日漸有「亞視化」的趨勢，亞視有司榮彬，TVB就有傳奇影業，爭在未抬兩箱銀紙出來開記招而已。正當大家打算冷待這傳奇之際，TVB卻殺市場一個措手不及：突然宣佈加價15%來進行回購，理由竟是維持公眾持股量。
呢個理由當真九唔搭八：1.要維持公眾持股量何其簡單，自古以來都係做完deal發現收多咗貨，承諾批返出來即可，使乜為此加價；2.回購價是根據公司價值計算出來，而非由回購規模的大小而訂，要符合公眾持股量，cut回購股數即可，仲可趁機慳返幾億落袋，說要為此加價，真係連基本的財務邏輯都講唔通。
一屋都係財技高手的TVB，不足一個月就話「計錯數」要加價，背後一定另有隱情。TVB早前多番暗示，神秘買家傳奇集團是「運吉」居多，實力相當有可疑。既然買家咁流，咁使乜對方一話想收購，價都未出，一星期後就加回購價，驚到咁？TVB股價不斷炒起，搏乜？
難道傳奇真係一個傳奇，雖然它名不經傳，但實情其代表的資金非常厲害？須知道，TVB副主席黎瑞剛是何許人。他曾隨同習近平訪英，一起造訪球隊曼城，之後即組財團入股曼城球會13%。TVB唔係《成報》，是香港大台，如有內地資金想在黎瑞剛反對之下取得TVB控制權，海迪會認為這是近乎不可能的任務。
有口痕友就提醒海迪，做人不能太短視，將件事拉長啲睇，可能會有新看法。咁就拉長返去2015年，TVB分兩次將台灣TVBS的股權以逾20億全數清倉，當時台灣傳媒指接貨人正是宏達電董事長王雪紅，即目前TVB大股東Young Lion的主要持股人之一。當時交易後已有人估計，王雪紅遲早會賣走手上的TVB股權，徹底分手，但前提是她要夠狠心。事關美國基金Providence Equity Partners（PEP）去年亦選擇沽售Young Lion權益，以Young Lion於2011年入股TVB作價55蚊計，假設PEP當時按市價（26蚊）沽貨，估計至少要勁蝕50%離場。
市場一直有說法，指有當年以Young Lion身分入股TVB的投資者，相當不滿TVB近年的股價表現，黎瑞剛無法交代。又有傳TVB中人曾經對外透露，TVB未來有意引入新投資者，但前提是黎瑞剛目前對TVB的持股有點少。綜合上述資料，理順事件先後脈絡，似乎TVB回購鬧劇，重頭戲還未上演呢。
海迪