體壇拾趣︰「最佳」保特:我拍得住朗尼

體壇拾趣︰
「最佳」保特:我拍得住朗尼

2017年勞倫斯體育大獎周二喺摩納哥舉行頒獎禮,里約奧運再拎三金嘅牙買加飛人保特,力壓C朗、勒邦占士等對手,第四度當選勞倫斯大獎最佳男運動員,保特開心到滿場自拍,仲自誇如果轉行踢波,應該有朗尼咁上下水準。
今屆勞倫斯男運動員嘅候選人其實都星味十足,好似NBA總冠軍騎士前鋒勒邦占士,幫葡萄牙首嘗歐國盃嘅新科球王基斯坦奴朗拿度(C朗)等,不過保特憑里約奧運再拎100米、200米同4x100米三金,繼09、10、13之後再拎呢個獎,30歲嘅保特當然好開心,滿場飛同其他運動員自拍合照,賽後仲話想轉戰足球界㖭。
呢位曼聯死忠話:「田徑壇已經冇咩嘢可以畀我挑戰,其實之前都有唔少球隊搵我踢吓波,我諗如果我真係專心踢波,水平可以同朗尼一樣。」

四度獲最佳男運動員嘅保特(前)心情靚靚,同一眾運動員及嘉賓包括最佳復出獎得主菲比斯(右下)大合照。互聯網

羅斯保俾老婆搶鏡

其他得獎者(見附表)仲有美國體操選手比妮絲,憑里約奧運四金一銅成為最佳女子運動員,美國飛魚菲比斯就獲得最佳復出獎,F1冠軍、德國羅斯保就拎到最佳突破獎,不過羅斯保風頭就似乎俾老婆Vivian Sibold搶晒,因為Vivian一套Deep V連身裙認真養眼。其他盛裝出席嘅索女,仲有前西班牙國腳佩奧爾嘅太太Vanessa Lorenzo同葡萄牙球星費高老婆Helen Svedin等。