自從特首梁振英唔連任，作為頭號梁粉嘅張志剛靜咗一排，近日又再出招，噚日佢係《明報》寫咗篇「上了花轎 還不知嫁去哪條村」為題嘅文，全文出盡力勸民主派咪提名薯片叔叔曾俊華，有民主派中人睇完哈哈大笑，話最有趣係張志剛鬧民主派，但為乜葉劉淑儀、曾俊華同林鄭月娥同樣係建制中人，薯片叔叔又自認支持老闆梁振英決定，咁點解民主派就只講林鄭係梁振英2.0，而唔話曾俊華係梁振英3.0？
呢個民主派中人話，張志剛咁講等同話「梁振英」呢個招牌好負面，所以民主派將呢個招牌掛落林鄭身上，點解唔掛埋去曾俊華身上？咁同明踩梁振英有乜分別？
最好笑係佢力勸民主派唔好「盲婚啞嫁」提名薯片叔叔，擔心民主派會賠上整個泛民政治前途！呢個民主派中人話，張志剛忽然咁為民主派「憂心」，一定有問題，「儍嘅都知，只要做同張志剛相反嘅事，就一定冇錯」。