迪馬利亞同卡雲尼咁啱喺情人節生日，呢兩位壽星仔喺禮拜二歐聯發威，前者梅開二度，後者亦有一球進賬，幫巴黎聖日耳門（PSG）喺歐聯16強首回合，主場4:0大炒巴塞隆拿。喺歐聯淘汰賽歷史上，未試過有球隊首回合落後四球都追得番，睇怕巴塞好大機會出局。
兩情人節壽星入波
原本以為係五五波，點知戰情好一面倒，PSG全隊壓迫做得好好，巴塞條中場毫無活力，發揮完全喺水準以下，布斯基斯防守隱形，而恩尼斯達就畀唔到波上前場，巴塞前後場脫節。喺18分鐘，PSG就靠喺情人節29歲生日嘅迪馬利亞，射入罰球打開紀錄。完半場前，喺冬季轉會窗剛剛加盟嘅達斯拿射成2:0。55分鐘，迪馬利亞喺禁區頂彎個靚波，遠射入網，PSG拉開到三球差距。72分鐘，輪到喺情人節30歲生日嘅卡雲尼入波，幫PSG埋齋，主場派咗四隻蛋畀巴塞。
賽後迪馬利亞同卡雲尼一齊喺更衣室切蛋糕慶祝，全隊都好興奮。之前踢過皇家馬德里同曼聯嘅迪馬利亞話：「今日真係好特別，冇嘢好得過喺生日大勝，我哋實在踢得太好，值得大炒一場！我哋全場控制戰局，雖然守住巴塞嘅『MSN』三叉戟係好難，但我哋做到咗。」
PSG喜氣洋洋，但另一邊巴塞就過咗個死氣沉沉嘅情人節。上次巴塞喺歐聯輸到咁大鑊，已經係12/13球季四強對拜仁慕尼黑，首回合輸四球，到次回合再輸三球，總比數0:7出局，就係巴塞俾人寸咗好耐嘅「七喜」事件。好多球迷擔心，如果次回合都係踢成咁，巴塞呢次怕且又要「飲七喜」！喺歐聯歷史上，從未有球隊首回合輸四球都贏得番（見附表），睇嚟巴塞都凶多吉少。據skyBET嘅賠率，巴塞晉級八強已經冷到10倍，至於PSG晉級就係1.04倍。
美斯阿蘇全場冇影
巴塞呢場都抵輸，雖然照舊控球較多，但隊波唔夠人勤力，跑動距離比PSG少八公里；而「MSN」三叉戟入面得尼馬踢得好少少，蘇亞雷斯同美斯都唔見影，所以巴塞今場只得一腳中目標射門。發揮好差嘅布斯基斯承認，呢場係戰術全敗，「PSG各個範疇嘅發揮都好過我哋，包括戰術部署都係。我哋返到魯營，會嘗試去追，但大家都知一定好難。」
