內地灃沅弘集團（FFCL）收購本港志昇證券後，噚日舉行開業典禮與搬遷儀式，竟然請來藝人吳君如剪綵。原來吳君如阿媽係志昇證券嘅長期客戶，吳君如本身亦有部份投資由志昇負責，順理成章支持下。
講到投資，吳君如話冇心得可以分享，因佢只選擇磚頭同藍籌，貪佢哋夠穩陣，佢認為：「投資講運氣，我情願擺落電影到，我拍啲戲全部賺錢嘅。」
至於佢舊年10月獲伴侶陳可辛轉贈歡喜傳媒（1003）股份，兩人合共持有市值近3億元股份，佢笑言呢批股份屬於「家用」，佢不熱衷短炒，根本冇時間坐定定留意消息再決定買賣。
另外佢亦有為女兒買基金儲錢計劃，唔擔心女兒因有錢俾男人呃，話「我成日同佢講，我會使晒啲錢唔留畀佢，但基本生活會有」。