前日情人節係男士送花畀女士，等女士晒命嘅日子，當中最出位係有人化身Iron Man，手持鮮花於金鐘港鐵站癡癡地等，搞到好多人都想知佢女神到底係何方神聖。後來Iron Man同女友喺車廂嘅照片迅速喺網上曝光，二人被起底，男主角叫Paul Ho，女主角就叫黃淑瑩（Fion），仲好大方接受傳媒訪問。
博宣傳呃like
不過唔使好耐，Paul就被人踢爆原來有老婆，再進一步被爆Fion其實係Paul旗下製作公司一名𡃁模，黃夏蕙就係Paul嘅契媽。好似好複雜，簡單啲講係一個局，純屬玩嘢博宣傳。
夏蕙姨前日接受電話訪問，佢「大義滅親」好嬲咁話：「做呢啲咁賤格嘢真係要兜巴星！今日情人節，佢有家室唔應該玩呢啲曖昧嘢，咁唔好嘛，令人誤會。」當佢知道契仔目的係呃like嘅時候，先至冇咁火。
Paul受訪時亦承認係宣傳技倆：「旗下不嬲有6到8個女仔，大家做娛樂圈都明係小宣傳玩吓。我同太太結婚20年，噚晚送咗花畀太太，完全唔係背妻偷食。」仲話太太好支持佢，對於被契媽鬧，Paul話要負荊請罪，又話：「阿媽（夏蕙姨）都成日話我大細路，純粹娛樂大家嘅小小事情……」
撰文：馮仁昭