在貿發局春茗中，貿發局主席羅康瑞輕鬆笑言飲奶粉比食薯片有益，唔想評論誰人可做特首。
羅康瑞係著名梁粉，佢比較奶粉與薯片之營養益處，畫公仔唔駛畫出腸，大家明白晒。問吓師奶仔N老師，佢個女兩歲半，個仔六個月大，湊仔湊女湊到一頭煙，究竟仔女鍾意薯片還是奶粉呢？師奶N話：「簡單到極，個仔細，搶住食奶粉，個女大啲，新年無意中俾佢在滿枱糖果小食之中，食咗蝦片薯片，依家弊咯，成日話要食，分分鐘問有無薯片。如果唔係咁，麥當勞對兒童有乜咁吸引力吖。嬰兒唔識世界，你餵佢乜就食乜，飲奶粉之嬰孩，飲六安士，八安士，話咁易，但稍為年紀大啲，懂得選擇，而父母又俾佢自由選擇嘅話，大細路以至大人一定鍾意食薯片多過飲奶粉。不過現在有啲中央大人當香港市民係一歲嬰兒，係要餵奶粉俾你，如羅康瑞等建制派，係鍾意有人餵佢地嘅，故此奶粉大受建制派歡迎，一啲都唔奇。」
汝曾被警告，薯片多吃無益，容易招惹喉嚨乾，喉嚨痛，最後形成熱咳，食薯片飲啤酒，或可收中和之效，或者飲烏龍茶呢類寒性飲品啦。飲奶粉又點，都有副作用嘅啫！大人飲奶粉，或引至腹瀉，視乎個人體質而定。嬰兒飲奶粉，更要有區別喎，CY之限奶令至今未撤銷，點解有限奶令呢，係因為內地人來港搶購外國牌子奶粉，集中於三隻，引起本地媽咪怨憤吖嘛！奶粉與本土派之興起，有關係㗎，CY之限奶令搞到港人及議員敵我分明，排斥內地媽咪，禁止內地人到香港搶購大量奶粉，直情係港獨催發劑，CY為始作俑者。點解內地人來港搶購奶粉呀，當初係因為內地製造奶粉，含有三聚氰胺，嬰孩吃後患上大頭症，營養則不足，嚴重影響中國下一代之素質，但投訴、抗議、上訪之受害者家屬，反遭拘禁，監察生產奶粉之官員，離職一段時間後，仍然可保官位，於是內地父母為之心寒，要來港買洋貨奶粉，王光亞孫兒亦食香港出售嘅奶粉。奶粉含三聚氰胺係內地發明，今內地高層到深圳傳聖旨，中央獨挺奶粉一人，咁樣呢個香港奶粉，即刻頭大起嚟，飄飄然瞓喺度等入閘，等人抬轎送佢入禮賓府！呢種中央奶粉，有冇內含三聚氰胺，兒童不宜呢，有待考究，唔怪得啲香港民意，係要食洋貨薯片而唔肯飲內地監製嘅奶粉咯。