表明上任要搞「理財新哲學」嘅林鄭月娥，噚日就示範乜嘢叫做新哲學。本身係選委嘅無黨派立法會議員毛孟靜日前收到林鄭致函拉票，發現嗰兩頁A4紙加標準信封，竟花多70%嘅郵費，Miss Mo嘲諷林鄭「堅離地到不食人間煙火」、「擔心呢位阿太點理財」。
合計畀多1,400蚊
林鄭嘅叻豬事自選舉以來不絕於耳，由搭港鐵唔識用八達通出閘、唔知便利店通常冇廁紙賣、曾任社署署長卻向懷疑向內地行乞黨送上500蚊，林鄭今次寄呢一封拉票信，其實每封只係需要畀$1.7，點知林鄭決定豪畀郵局，貼足$2.9，每一封畀多$1.2，如果以1,194位選委計，林鄭喺郵費就畀多咗成1,400蚊，唔通錢真係多得濟？經常批改學生中英文嘅Miss Mo話，林鄭喺信件上款只係寫上「尊敬的毛孟靜」，但冇寫「小姐／女士／議員」在後，Miss Mo話既然寫得「尊敬」，又點會直呼其名呢？