呢期最大花生味嘅娛樂新聞，係某富豪將名下一間大型商廈送畀女朋友，令呢位女友一躍而成為香港女首富，呢個商廈嘅命名，更加同富豪前女友有關。不過呢位大美人已經下嫁他人兼為人母，相信都同富豪關係告一段落，大家都係想佢講多次：「我真係恭喜你箒。」富豪其實都不乏女友，不過今次明顯寵愛一位，而冷落另一位，據報因為之前因為官司同身體出問題時，𠵱家呢位女友對佢不離不棄，甘苦與共，所以𠵱家就坐正咁話。
共患難易，共富貴難，其實唔單係家庭，連球隊都係；李斯特城上季創造傳奇，灰姑娘式捧英超冠軍，領隊雲尼亞里（圖）65歲人先首次領球隊拎頂級聯賽冠軍，仲一躍成為國際足協全年最佳教練，今季雄心壯志出戰埋歐聯，殺入16強將鬥西維爾，比起熱刺仲要好成績。但睇番聯賽排名，周日輸埋畀史雲斯後，已跌至第17位，比降班區多一分，由英超冠軍轉到踢英冠真係唔出奇。
球隊有咗榮譽，就冇咗團結，好似之前前鋒荷西烏路亞跳草裙舞，佢嘅經理人就鬧「小雲」冇口齒，答應畀新約佢，又話畀多啲上陣時間佢，都通通反口。英國傳媒都開始話李城內訌加劇，甚至「小雲」已經失去埋更衣室控制能力，𠵱家由班球員自生自滅。
呢兩個星期都可以話決定「小雲」嘅生死，英足盃對米禾爾、歐聯對西維爾，仲有聯賽對利物浦，一下唔好彩輸晒，真係最佳教練都可以被炒。其實佢過去真係畀唔到信心人，戰術保守又單調，英超冠軍講真有啲時來運到，應付逆境往往最考功力，又睇吓小雲又救唔救得番球隊。
文：牽牛