三十而立，對女人來說意味告別青春， 走進人生另一階段。2005年，當時踏入三十歲的彭秀慧(Kearen)寫下了第一個自編自導自演的舞台劇作品《29+1》，演出超過80場，叫好又叫座 。今年， Kearen決定將這套不打算再重演的舞台劇搬到大銀幕，並找來即將踏入三十歲的鄭欣宜(Joyce)飾演女主角。首次擔正，難怪Joyce在受訪時大嗌：「我覺得導演好大膽呀！」
統籌：林妙萍
撰文：陳蔚渝
攝影：周樂恒
攝錄：李祉澄
化妝：Samuel of 江中平化妝室 (鄭欣宜)、Angel Mok (彭秀慧)
髮型：Milk Chan of Xenter (鄭欣宜)、Joe Lam of Private i Salon(彭秀慧)
Kearen首次執導，搵來Joyce飾演女主角，年齡純粹巧合，主要是看中Joyce樂天又正面的性格，與角色相似。
Kearen眼中的Joyce，是充滿能量的一個女生，「唔單止是歌手形象，我都有睇過佢做嘅戲，其實佢好有power，黃天樂呢個角色係需要好高energy嘅演員去做，我覺得香港唔係好多呢類演員，所以我𠵱家都覺得呢個選擇好好。」
我們的第一次
Joyce雖然不是第一次拍戲，不過卻是第一次佔重戲份，所以難免欠信心，「我都有同Kearen講可唔可以畀啲信心我，我發現做戲有一樣嘢好得意，做歌手係做自己，而拍戲係要完全放低自己，去pick up另一個生命。」Kearen則認為遇上這部戲的演員非常幸運，「 因為我係第一次，對電影都係新嘅認識，但好彩佢哋都相信表演係要準備，變咗佢哋好相信導演，我由劇場出身，所以一定要做好指導演員嘅工作，如果出嚟有人覺得演員做得唔好，我會難辭其咎。」
由劇場走進電影
由劇場出身的Kearen，其實早在2005年已經參與過電影《伊莎貝拉》 的編劇工作，回想也算是開啟了她的電影路，「2013年我決定唔再做《29+1》，因為做得太長時間，自己都唔好意思，我沉澱自己想做乜嘅時候，有人敲門同我講其實仲有好多人想睇呢套戲，可以試吓變成電影，經過咁多年，我覺得可能係一個時機，所以就去做喇。」由獨腳戲變成電影，需要加入不同元素與角色貫穿， 所以執導最難是要短時間內與一大班人溝通，「始終電影係另一個世界，有佢自己嘅語言，合作嘅夥伴都係好耐嘅電影工作者，所以佢哋睇我好得意，我既係新導演，但又好似有啲經驗。」不過《29+1》由Kearen一手一腳寫出來，所以當然無人會質疑她，「佢哋好尊重呢個創作，特別係老闆，佢感覺到呢個係我個仔，所以採取不干預政策，因為佢哋相信呢套戲做咗咁耐又咁多人鍾意，一定有原因，所以覺得自己冇做錯決定，將《29+1》擺上銀幕。」
我是一個幸運兒
Joyce在過去一年大豐收，踩過界拍劇拍戲，曲奇餅生意越做愈越大，更憑一曲《女神》橫掃各大樂壇頒獎禮，「我覺得自己係一個幸運兒，呢一行係最難觸摸嘅行業，因為我哋嘅生與死決定喺觀眾手上，所以好彩我得到一首歌係我好相信，又好彩好多人覺得呢首歌未必啱呢個市場但我自己好堅持。」不過頒獎之後卻引起了一輪負評，問到Joyce面對不同聲音的反應時，表現相當豁達，「無論幾紅幾唔紅，都有贊同與唔贊同嘅聲音，其實係要學識去接受。」不過Joyce坦言小時候也曾經介意過，「我細個覺得好唔開心，點解大家要憎我，但𠵱家會明白點解當時會發生呢啲事，因為如果冇發生過我𠵱家真係好接受唔到，好在我身經百戰。」
平日性格活潑的她，放假反而享受一個人，「香港每個人都好忙，我最鍾意一個人離開香港，然後熄機唔同任何人溝通，了解自己鍾意乜嘢，同想要乜嘢，係要自己靜落嚟先可以知道。」
更多精采時尚內容，盡在 http://add.appledaily.com 。