藝人生活日夜顛倒，要維持同家人嘅關係唔容易，祖兒入行多年來一直都好錫家人，侍母至孝，對胞弟亦疼愛有嘉，其實圈中更有唔少愛同細佬妹感情深厚嘅例子。
黎姿
14歲就加入娛樂圈嘅黎姿（現名馬黎珈而），同細佬黎嬰感情一直好，黎嬰喺2007年5月遇上嚴重車禍，黎姿瞓身照顧細佬，更喺翌年以照顧細為由，暫停拍劇，全力打理黎嬰開嘅醫學美容公司。同年，佢秘密嫁畀商人馬廷強，婚後除咗相夫教女，更抽時間打理細佬盤生意，經過10年打拼，佢喺上個月成功以卓珈（8358）喺港交所創業板上市，身兼集團主席及行政總裁嘅黎姿同細佬出席上市儀式時，表示上市係要「延續細佬嘅精神」。
張栢芝
至於曾經同黎嬰傳過緋聞嘅張栢芝，亦係圈中有名愛細佬嘅人，佢同兩個細佬張豪龍同張柏文感情要好，栢芝更唔止一次打本畀細佬做生意，其中柏文就試過開車行，可以成日有靚車揸，而張豪龍喺04年淡出娛圈，轉行做滑水教練。
陳嘉桓
現年24歲嘅陳嘉桓（Rose），除咗出名打得之外，原來佢都好「湊得」——照顧佢現年1歲幾嘅同母異父嘅細佬Jaxton都好拿手。佢不時喺Instagram貼自己同Jaxton嘅相，仲落埋hashtag「#陳嘉姐與細B之日常生活」。雖然Rose同Jaxton相差22年，話係兩母子都講得通，但陳嘉桓一於少理，繼續同細佬「放閃」。
吳若希
另一個同細佬相差大、而又好愛錫對方嘅例子，仲有準媽媽吳若希，現年24歲嘅吳若希，前年其母因踩單車發生意外撞到頭部昏迷，吳若希一方面要照顧母親同應付工作，亦要顧住比佢細12年嘅細佬吳梓楓。
陳慧琳
靚媽陳慧琳（Kelly）雖然近年比較少喺螢光幕前出現，但想當年，Kelly除咗顧住博殺，仲帶挈埋細佬陳司翰加入娛樂圈，當年28歲嘅Kelly，入行約6年，佢力撐比佢細4年幾嘅細佬陳司翰入行，仲簽埋同一個經理人鍾珍，實行兩姊弟拍住上。不過，姊弟星途有異，後來陳司翰淡出娛圈，仍不時有新聞，做家姐嘅Kelly少不免要回應。亦有傳陳司翰愛夜蒲，Kelly苦勸不果。