堂堂衞冕嘅李斯特城，今季淪落返去下游，家陣聯賽連輸五場，下輪分分鐘就跌埋落降班區。點解一隊波相差一季，係唔見咗個尼高路簡迪箒，就變晒樣？因為簡迪唔喺度，仲會令其他人踢得差咗，例如「飲水哥」真禾特（左）。
睇番各項統計數據，李城今季嘅埋身搶截同攔截傳球嘅次數大退步，因為少咗簡迪呢個搶波王喺度，令到李城中場嘅防守力差咗好多。喺上季，簡迪場均搶截同攔截分別係4.7同4.2次。咁喺今季，李城啲簡迪接班人踢成點？艾馬迪嘅場均搶截同攔截連兩次都冇，可以話兩個艾馬迪都唔夠一個簡迪咁搶得；至於安迪京治係攻中出身，防守數據更差，而南柏斯文迪受傷患影響，上陣唔多。
冇咗簡迪，唔單止李城本身中場掃蕩力大跌，仲搞到真禾特踢得差咗好多。真禾特明顯唔係一個頂級中場，但上季有簡迪喺身邊，佢放心好多，可以多啲上前參與進攻，入咗兩球同交出七次助攻。不過，飲水哥今季聯賽就未有波入，助攻竟然都係得一次咁大把！點解佢進攻數據差咗咁多？因為佢踢得後咗，兼顧更多防守工作。簡迪一個頂兩個，解放咗真禾特，如今身邊拍檔都係平庸之輩，飲水哥自然唔敢咁進取，要喺後面逗住啲位。
飲水哥今季搶截次數多過上季，但製造入球機會次數大減，由上季場均1.3次跌到今季0.5次，所以唔怪得少咗咁多助攻。因為位置後咗，真禾特今季長傳次數係多過上季。足球得11個人踢，少個幫手就真係差好遠，所以今季李城進攻差咗，同中場少咗支援都有關係。
文：咖喱