東方龍獅下星期三就會出戰亞冠盃分組賽，第一場就要作客中超勁旅廣州恒大，好似麥基、李康廉等球員都話好期待！不過球會對上一次踢亞洲賽，已經係2009年嘅亞協盃，對於亞洲賽經驗不足，教練陳婉婷都話有啲輸蝕：「係有啲蝕章，但經驗係要累積嘅，過去嘅嘢改變唔到，咁就努力現在，做好備戰。」東方今個星期港超聯輪空，嚟緊禮拜日就會上廣州。