一向鍾意煮餸嘅白鴿黨議員林卓廷，趁前日情人節，除咗陪老婆煮飯仔撐枱腳，仲特別去大圍街市買餸煮好嘢。噚日立法會開大會，佢就特登轉幾次車，將自己秘製嘅牛腩蘿蔔帶返立會，同記者分享，佢仲搵埋架木製手推車「開檔」，扮足地道街邊美食。
阿廷話上次邀請記者去屋企拜年時，唔少記者食過佢煮嘅牛腩同蘿蔔都話好食，所以趁前日有時間，特別用兩個幾鐘再煮畀記者食，話最重要係自己切牛肉，因為咁樣大細先會最啱口味，煮時亦參考過「阿一鮑魚」食譜喎。
搭車由石門運抵
阿廷今次帶牛腩蘿蔔去立會都相當麻煩，佢手拎住個電飯煲，先由石門屋企搭巴士去沙田，再由沙田搭地鐵到金鐘立法會，目的係想畀記者試佢嘅秘製牛腩蘿蔔，認真誠意十足。
一邊推住立法會秘書處提供嘅木製手推車，一邊幫記者裝牛腩嘅阿廷又笑言，自己似流動小販，笑稱應該跟小麗農曆年去開檔喎！咁阿廷嘅牛腩蘿蔔好唔好食？八方見到唔夠半小時就俾人清晒，仲一度令立會走廊排長龍，唔少記者食過都話勁好味，話阿廷廚藝絕對夠資格上街擺檔喎。