今日2月14號情人節，是一個充滿情濃愛意的日子。一眾馬圈情侶當然唔會唔趁呢個好機會向另一半送上驚喜，共同感受濃濃愛意，以令彼此之間的感情更進一步。
唔知啱啱成為新郎哥嘅騎師梁家俊，會諗住點同佢老婆仔李潔瑩慶祝婚後首個情人節呢？梁家俊表示：「我都好想喺情人節食一餐好豐富嘅晚飯，但冇辦法，因我周三（15日）要騎輕磅馬，所以都會喺屋企一齊好安靜咁度過，可能之後先搵節目補祝情人節。」
呢對結咗婚嘅就喺屋企玩煮飯仔，咁唔知練馬師賀賢同未婚妻李姿敏會玩咩花臣呢？李姿敏回應話：「佢夜晚推咗個約會，同我一齊食餐晚飯，係食我選擇嘅日本菜。我當然有預備禮物俾佢，我都希望佢可以有預備禮物俾我。」
到最後，當然要捉住現時練馬師當中，唯一仲係單身寡佬的練馬師蘇保羅訪問一下。佢表示好有信心於情人節之前會搵到情人一齊度過，並坦言就算最後搵唔到，都唔會覺得寂寞咁話。