薯片叔叔曾俊華同奶媽林鄭月娥喺情人節各自出情書，老公早已離世多年嘅葉劉淑儀，亦唔輸蝕畀兩個對手，而且出招仲實際過佢兩個。佢噚日親自出馬，中午手攜過百朵玫瑰花，現身灣仔喜帖街派畀市民，而且仲好受歡迎。
囡囡突要公幹取消飯局
葉劉噚日其實都好忙，全日都有安排見不同選委，不過佢中午都親身去灣仔派玫瑰花。八方見唔少街坊對葉劉手上嘅玫瑰花好有興趣，主動上前索取，亦有部份街坊主動要求同葉劉合照留念，葉劉為展示親民一面，親民騷做得相當落力，面對小朋友攞花時，66歲嘅佢仲踎低足足成分鐘畀攝記影相，真係少啲腳骨力都唔得掂。
問到葉劉噚日情人節有乜節目時，葉劉就苦笑話，原本噚日約咗愛女葉榮欣食飯，點知囡囡突然要公幹飛咗去上海，所以自己見完選委後，只能自己食個簡單晚餐慶祝。
雖然玫瑰花受歡迎，但唔知葉劉係咪選情危急趕住拉票，定係因為肚餓未食晏，噚日前後派咗15分鐘，就同助手急急腳上私家車走人，剩低成大箱玫瑰花未派完，要由留低嘅助手執走。