曾俊華喺奶媽造勢大會當日搞眾籌唱對台，擺明睇住奶媽嚟打。林鄭個競選口號叫「We Connect」，曾俊華噚日整咗個「曾．Connect」，由薯片叔直接打畀留言嘅網民收集意見，接聽嘅市民都嚇咗一跳，反問「曾生你自己打嚟呀？」不過，薯片叔全程口窒窒，口齒真係唔太伶俐。曾俊華嘅競選辦就整咗條片喺facebook同大家分享。
曾俊華打畀小市民，唔少人都有啲難以置信，但由於傳銷電話、問人借唔借錢嘅電話大行其道，片中即使市民聽到有人自稱曾俊華，都覺得係打嚟問自己借錢，唔想再聽落去：「唔使啦，唔該，唔使啦，唔該」，即時收線，慘食閉門羹嘅薯片反應都畀唔切。或者有機會成為「未來特首」又點呀，市民一樣收你線，呢啲咪係人民嘅力量囉。