唔經唔覺，原來生產力促進局已經成立咗50年，總裁麥鄧碧儀透露，局方未來一年會有好多搞作，除咗9月會以智慧城市為題，搞大型國際研討會外，今年仲會繼續推動3D打印技術。局方2015成立咗全港首個提供一條龍3D打印顧問服務嘅支援中心「3D打印體驗廊」，畀機會唔同行業嘅人，親身體驗3D打印過程。今年佢哋會再斥資500萬元，引入全港首部開放畀業界使用嘅鈦金屬3D打印機。
局方𠵱家仲同過百間中學合作舉辦中學生3D打印設計比賽，邀請學生哥重新設計20個維港兩岸地標建築物，包括舊政總、尖沙嘴鐘樓等，學生會以3D技術打印過千組件，配合燈光，合力打造一個面積200平方呎嘅3D維港模型，估計年中有得睇，八方拭目以待。