現年29歲林夏薇，11年挾林峯堂妹之名進軍香港娛樂圈，簽約無綫6年，一直有唔少演出機會，到啱啱結局嘅《乘勝狙擊》，林夏薇終於攀上一線花旦之位。
入行以嚟，林夏薇對感情事一向低調，但15年佢失驚冇神嫁俾大自己15年、身家逾20億嘅金融才俊莫贊生。自此，林夏薇升呢成為億萬闊太，家住山頂獨立屋，得閒坐遊艇出海過寫意生活。
不過「闊太」身份有辣有唔辣，昨日有報道指林夏薇老公曾經離過婚，又試過秘戀o靚模朱裕琳(Caroline)，感情生活亦多姿多采。為咗箍實老公，林夏薇都唔敢放軟手腳，近年個樣越變越精緻嘅佢，被影到現身城中唔少富婆明星都幫襯、位於北角嘅「換膚秘竇」，實行勤力執靚樣。