周一上演嘅英超獨腳戲，作客嘅曼城憑住史達寧士哥及後備上陣嘅阿古路逼使對方後衞泰朗明斯擺烏龍，以2:0擊敗般尼茅夫，全取三分後升上聯賽榜第二位，同榜首車路士嘅距離縮窄至八分。不過藍月亮今場有巴西新星加比爾捷西斯傷出，連領隊哥迪奧拿賽後亦話要搵耶穌打救捷西斯。
曼城今戰開賽僅14分鐘就已經有由彭美拉斯以2,700萬鎊加盟嘅19歲新星加比爾捷西斯傷出，要退下火線，由阿古路入替。雖然球隊最後以2:0勝出兼升上次席，不過，哥帥就好擔心捷西斯嘅傷勢，佢賽後話：「我哋起碼要等到明（今）早先知道捷西斯嘅傷勢，𠵱家我真係冇乜嘢好講，我哋惟有喺今晚祈禱，希望捷西斯嘅傷勢並唔嚴重啦！」不過，好彩後備入替捷西斯嘅阿古路表現唔錯，連哥帥亦話：「阿古路喺場上表現好好，亦好有鬥志，相信今場之後，佢嘅比賽信心會返番晒嚟。」
祝福艾達順利做老竇
另外，哥帥除咗識得祈求上主保祐球員之外，原來亦好有品好窩心，係暖男一名。話說係曼城擊敗般尼茅夫，球證長雞一鳴嘅時候，哥帥就即刻入場拉住般茅嘅中場哈利艾達，預祝佢就嚟做老竇（圓圖）。
艾達喺2015年12月有過囡囡一出世已經夭折嘅慘痛經歷，所以當哥帥知道艾達就嚟做爸爸，特登走去同佢講：「你之前發生嘅事我都好難過，祝你今次順順利利！」哥帥咁嘅舉動，就令艾達好感動，艾達之後喺球隊嘅官方twitter留言話：「哥帥祝我同我嘅另一半一切順利，佢真係值得人哋尊重，呢啲就叫做卡士囉！」
