特首選舉提名期開始，奶媽林鄭月娥有西環撐到出晒面，莫講150個提名，要500、600個提名都冇難度。不過佢對手薯片叔叔曾俊華就唔同，建制派又話怕咗北京、西環唔敢提名，民主派又有人話薯片叔叔係建制派，唔想提名佢，要搵150個提名真係唔易。不過薯片叔叔都有真朋友，自由黨榮譽主席田北俊肯定係第一個。
田少噚日喺fb上載一堆特首提名表嘅照片，佢自己嗰份放喺面，仲話情人節佢就冇情書，但就有提名書，好明顯又抽奶媽水啦，之後仲有一堆hashtag，包括#我係001、#估下下邊幾張係邊個？之後又再抽奶媽水，加個hashtag#今天我們談一國兩制也談一生一世，仲不忘抽埋葉劉水，出埋#田毛毛識得擦咗我個身份證，真係不愧為抽水王。