那些年嘅情人節你哋係點過？上個月榮升人妻嘅80後護士Suzanne話，當年老公Brian會將玫瑰花收喺課室櫃桶送畀佢。無錯，Suzanne同Brian嘅愛情故事由中學開始，中一認識，中五拍拖，長跑十年，上個月終於衝過終點線。80後師機Brian話，「我老婆係我嘅初戀！」
唔止Suzanne同Brian係中學同學，連佢哋嘅兄弟姊妹都係識咗十幾年嘅中同，感情好到不得了。睇結婚當日接新娘玩新郎嗰陣，兄弟姊妹就不停講笑，有兄弟話：「今日係Brian你最後一日可以做自己喇！」又有姊妹話，「我哋有個幕後玩家喺入面o架！」Suzanne諗返起當日嘅情景就大笑話，「我梗係唔係幕後玩家啦！」Brian都幫老婆口話，「我哋啲上把下把位成日轉嚟轉去o架！」
到將要出門，Suzanne爸爸將個囡交畀Brian嘅時候，就笑住同Brian講，「Suzanne係傻嘅，不過你唔傻，你識揀佢！」事實上，呢兩公婆都係識貨之人，識揀機師老公同護士老婆，真係...這些機會！
兩位睇落好似係人生勝利組，但係同運動員一樣，贏嘅背後付出好多努力。出身名校嘅Brian高大靚仔，職業仲係機師，點會無女仔埋身呢？但係十年就好似一場障礙賽，一齊面對會考、高考、入大學、出社會工作，二人三足跨過重重難關，呢一切經歷令Brian知道，Suzanne對佢嚟講係「輸唔起！」。
Suzanne話踏入七週年遇到最大考驗，Brian要出國受訓，要分隔異地一年，「點算呀？驚係七年之癢，所以我哋都好努力維繫。出發前，我整咗好多關於我哋嘅嘢畀佢，出發後日日講電話，我一放假又飛去搵佢，嗰一年先平安渡過。」
兩個人喺跑道上一齊堅持，一齊儲錢籌備婚宴，完全唔使雙方父母協助。終於，一齊走到人生最重要一刻，Suzanne挽住爸爸步入會場，爸爸再將愛女交畀Brian。嗰刻就好似走咗入時光隧道，Brian話：「我初初識佢仲着住中學校服，到今日着住婚紗行入嚟，我好感觸。」
一場婚禮，一對主角無方法演技，無為對方預備乜嘢驚喜，反而用好多時間敬酒，將眼淚、笑聲同擁抱留畀每位親友。一對80後難得一齊走過人生十年，用「真摯」兩個字見證一生一次，真摯嘅愛情、兄弟姊妹真摯嘅友誼、親友真摯嘅祝福，相信呢一切都唔需要公價嘅人情去見證！
鳴謝：Wedding Birds
記者：鄒倩婷（阿仙）
攝影：Kaman、Meng、峰、Neo
剪接：Roy
編審‧導演：陳家文