當情人節都要用嚟抒發對一國兩制嘅感情，恕八方做唔到、唔夠愛國愛港，但林鄭月娥嘅老公林兆波竟然可以！噚日奶媽公開佢極之低調嘅老公寫畀佢嘅一封信，話要喺情人節期望奶媽能成功當選，為落實一國兩制作出貢獻。對手曾俊華則直線抽擊，拋下一張同太太食早餐嘅陽光照片，然後一句「#今天我們不談一國兩制只談一生一世」作結。呢場情人節PK戰，邊個贏邊個輸？套用林鄭一句話，「大家心中有數」。
網民：好似李波咁被迫寫
林鄭原本以為「放閃」呃like，喺情人節公開老公呢封情書可以搶回唔少分，但睇嚟效果都幾差。八方摘錄咗幾佳句，等大家評分：「（我）期望妳能成功當選並在新崗位上為香港市民努力工作，為落實一國兩制作出貢獻」、「我在2月3日那天（奶媽造勢大會）選擇不出現。但我對妳的支持是無限的」、「I support because you love HK.（點解唔係because I love you嘅？）」林鄭噚日喺電台節目中就話，呢幾個星期同老公見面嘅時間好少，又話情人節都應該唔會見到，真係坦白。
奶媽出post後，嬲嬲排山倒海，網民質疑原本唔想林鄭參選的林兆波好似李波咁，喺脅迫下寫情信。薯片之後搶攻，出咗一張同老婆兼競選辦職員喺一間社企食早餐嘅相，然後喺facebook拋下一封「給香港的情書」：「情人節的真諦不是情人，而是幸福。不論你是單身、熱戀、還是金婚，今天應該問的是『你幸福嗎？』」薯片最後以「#今天我們不談一國兩制只談一生一世」嘅hashtag作致命一擊，結果反應係點？八方知道，但八方不說，以免傷及無辜嘅兆波。
另一參選人胡國興，就喺facebook揸住紮玫瑰花放閃，同老婆say sorry，話開完會後會趕返去同佢食飯。
李八方