噚日情人節又送花又送朱古力，微信（WeChat）亦唔輸蝕，喺情人節當日提高紅包額度，由原本每個紅包不超過200元（人民幣、下同），調整至最高可發520元（普通話諧音為「我愛你」），夠晒有意思。
微信除咗紅包有金額調整外，最近推出嘅「黃金紅包」都為咗情人節而將可發送總金額由1,000毫克提升到1,314毫克，取其「一生一世」意思。呢隻黃金紅包系統係微信喺農曆年時推出，畀用戶預先買黃金儲備（金價同市場價掛鉤）送畀朋友，而數量最多可發100個，原本總克數不超過1,000毫克。
今次唔係微信首次提升紅包額度，舊年5月20號都將紅包最高金額調整至520元，唔通情真係比不上金堅？