內地企業成日話要「走出去」、國際化，不過時不時都聽聞有企業喺海外發展觸礁！好似賣羽絨同男裝嘅波司登（3998）咁，近年不斷關閉內地分店之餘，有指位於英國倫敦嘅旗艦店近日亦已結業，似乎意味海外發展策略「唔多掂」！
波司登以生產同賣羽絨起家，之後更加賣埋男裝，曾連續多年奪得國內羽絨服銷量冠軍；雖然喺國內做到一哥地位，不過海外業務表現應該麻麻哋。2011年，波司登斥資2.4億港元買舖，翌年7月洗咗3,500萬英鎊開倫敦旗艦店，當時管理層指希望藉此跳板打開歐洲市場，不過最後都唔多成功。唔止官網執咗，就連旗艦店亦關門大吉。
事實上，2014年集團亦曾經喺美國曼哈頓開過男裝pop-up store，產品更加喺紐約時裝周亮過相。當時擔任波司登美國顧問嘅前Hugo Boss和Joseph Abboud高層Marty Staff仲話，公司計劃進駐高級百貨公司，亦有物色曼哈頓物業，打算收購後開店，但最後都係冇曬聲氣喎！