噚日情人節，珠寶商謝瑞麟（417）嘅靚太主席謝邱安儀（Annie）理應佳人有約，但佢竟然喺午宴自爆為生意忙住做空中飛人，只能度過一個忙碌情人節。
情人節冇得sweet sweet咁過，但Annie都冇唔開心，事關老公兼謝瑞麟副行政總裁謝達峰（Tommy）一早已預約定佢今年8月去美國睇日全食，平時都會經常帶佢浪漫睇星㖭！
原來Tommy係天文發燒友，有次為睇流星雨帶Annie喺大嶼山球場露宿一晚。華華問佢有冇俾對方潛移默化愛上睇星？Annie笑笑口話冇，仲話「睇星一啲都唔sweet，好辛苦，睇日食仲有曬」，但因為「我鍾意同佢（Tommy）喺一齊」，所以老公去邊都陪到實。
講開情人節，一向講求員工生活同工作平衡嘅香港寬頻（1310），好多節日都會畀員工早啲收工同親友歡度佳節，好似噚日情人節撞啱要返工，一班高管噚日朝早忽發奇想決定畀員工提早一粒鐘收工，由人事部向全體員工發電郵公佈，好多員工打開電郵時都好驚喜，公司仲話提早放工一粒鐘，大家除咗送驚喜畀摯愛，亦可選擇同父母及好朋友一齊度過一個愉快嘅晚上。
香港寬頻發言人就話，過去幾年，好似中秋節、冬至、聖誕節前夕或者當日都會畀員工放早半日，今次情人節提早放人，純粹係班高管想畀個驚喜員工，計我話，呢啲驚喜真係唔怕多啲嚟密啲手。