情人節講愛情，究竟2010後、80後、90後同60後睇愛情有咩分別呢？
1. 戀愛三代溝：拍拖做啲乜？
2010年後、6歲嘅Birdly同巧兒聽到拍拖，就話「拖手」、「錫錫」、「攬攬」，Birdly自爆有心上人Hanna，問佢幾時可以拍拖，佢就話：「我要由幼稚園升上小學先可以！」80後Ming同90後Tracy拍拖兩年，未拍拖前已經做晒拍拖會做嘅嘢，Tracy話：「未拍拖已經拖過手，借啲咦就拖埋嚟！」阿Ming話追咗Tracy三個月，表白三次先成功。60後嘅葉生葉太結咗婚37年，佢哋話當年追求同拍拖分得好清楚，追就追，拍拖就拍拖，葉太反問記者：「你信唔信吖？我哋真係約會咗一年，先拖手o架！」
2. 戀愛三代溝：邊個畀錢？
當女仔認為「乜嘢都要男人畀錢！」就會被指係「港女」，但係60後嘅葉生就唔認同，仲話：「100%係我畀錢，洗得好開心o架！」葉太都理所當然話，「梗係佢畀啦！」葉生覺得如果認定咗對方，就唔計較呢啲錢，仲驚老婆唔洗佢錢添！8、90後阿Ming同Tracy話多數AA制，Tracy話唔介意畀錢，「如果我畀到都代表有能力，而且真係發展落去，佢啲錢咪即係我啲錢！」
3. 戀愛三代溝：邊個食住邊個？
2010年後6歲嘅巧兒相信可以做食住人嗰個，佢話無心上人，但自爆有男同學鍾意佢，仲會嗌佢：「女神！」葉生直認自己畀老婆食住，一切家庭事務都交畀太太話事。阿Ming就話同Tracy關係平等，「追佢嗰陣梗係尊佢為至寶，但係做咗情侶就唔可以當佢娘娘咁縱容，大家要有商有量，所以無話邊個食住邊個。」
4. 戀愛三代溝：為對方做過最Sweet嘅事
人細鬼大嘅Birdly好識氹女仔，話去日本旅行嗰陣，買咗條手鏈送畀Hanna，仲話Hanna都有送玩具畀佢，真係兩小無猜！葉太認為自己為老公生咗兩個女係最Sweet嘅事，葉生就話送花畀老婆係最Sweet，雙方都非常認同。不過，Ming同Tracy就猜唔透對方所諗嘅「最Sweet」。Tracy認為送結他畀Ming係最Sweet，但Ming就覺得相比送禮物，Tracy曾經親自下廚反而令佢最Sweet。而阿Ming認為同Tracy去山頂食晚飯係最甜蜜，點知Tracy大爆間餐廳其實係佢搵，唔明點解係阿Ming為佢做最Sweet嘅事，阿Ming解釋，「因為係我畀錢！」Tracy邊笑邊話，其實做細微嘅事，例如接佢放工先最Sweet，阿Ming就話：「女人真係難捉摸！」
5. 戀愛三代溝：見家長
Birdly話無問過父母鍾唔鍾意Hanna，但係平時同Hanna傾計，已經傾「結婚嗰啲嘢」，咁幾時結婚呢？佢話：「40或者42歲囉！」認真搞笑！Tracy話第一次見阿Ming父母係新年去酒樓團拜，並無刻意打扮，覺得做返自己最好。阿Ming就話見Tracy父母緊張啲，「我有打扮，始終係男仔，要畀到信心對方家長。」葉生葉太已經唔記得第一次見對方家長係幾時，不過葉太話記得當時好緊張，打扮都斯文啲。葉生就話自己好識討好岳父岳母，岳母鍾意打牌就陪佢打，仲會鬆章，「我相信無一個做女婿好似我咁巴閉，我會同岳母鬥講粗口，佢好玩得，好開心o架！」
6. 戀愛三代溝：初次去旅行
阿Ming同Tracy拍拖一個月就單獨去旅行，佢哋自爆：「家長唔知我哋兩個去，話係同成班朋友去o架！」葉生葉太就保守得多，拍拖時去旅行，真係同成班朋友去，葉生話：「係分房瞓o架！邊有咁爽呀？我梗係想同埋一齊瞓啦，唔敢做，好想做！」
記者：鄒倩婷（阿仙）
攝影：峰、Neo
剪接：Roy
編審‧導演：陳家文