【本報訊】一個是IQ爆棚的會考狀元，因罕見病「威爾森氏症」擾亂大腦神經被誤診精神病，一度割脈自殘；一個是初戀步進教堂，未嘗失戀即失婚的佳人。一段姊弟戀，相距8年，兩顆絕望的心走在一起。「feel會變，溝通先係實在嘅嘢。」小倆口異口同聲。由無人睇好到如膠似漆，走過高山低谷，慶幸開出最美情花，他們是關子祺及廖秀儀。
記者：呂麗嬋
「我哋大纜都扯唔埋」、「佢唔係我杯茶」……走進小倆口的家，到處洋溢愛的痕迹，但一問起他們的愛情故事，小夫妻左一句「冇feel」、右一句「冇諗過」非常合拍，他倆背景又確南轅北轍。37歲的子祺是尖子，中學讀英皇，會考8A2B，高考3A2B，選修生物化學，矢志做科學家。「會考報10科，係想10A，只有8A2B已唔開心」。要求完美的尖子，情緒卻如過山車。
「背景差異非問題」
「威爾森氏症患者影響肝臟，不能排出銅致入血上腦，擾亂大腦神經，我20歲發病，被誤診係精神病」。病情每下愈況，行路要用手杖，說話語意不清，拖拉3年，轉腦科血液科，確診「威爾森氏症」。研究遺傳基因，偏偏救不了自己，幸好遇到好醫生。「我覆診時望到佢名牌，記得睇過佢嘅paper」。服新藥、學習接受不完美，病奇蹟好轉。
2006年，停學3年後重返校園完成碩士及博士，「喺邊度跌倒，就要喺邊度爬起身」。一隻手拿不住試管，他用兩隻手；手震影響寫字，他申請延長考試時間。「以前從不跑步，因為唔夠人快，唔做冇把握嘅事」。若只能活一場，他說不想再讓成敗為自己設限。一場大病學懂享受沿路風景，2008年在教會認識大8年剛離婚的廖秀儀，兩個「大纜扯唔埋」的人，終於相遇。
「大家唔使包裝自己，真正坦誠溝通」。現年45歲的廖秀儀前夫是初戀情人，未嘗失戀便失婚，她形容「個心碎晒」。「信任唔到其他人，覺得被出賣」，拚命工作麻醉自己。「好傷，冇諗過投入另一段感情」，但愛情來了擋不住。由尖子說到自殘、由初戀說到失婚，兩顆曾絕望的心，相約看煙花，頭頂盛放花火，見證二人跨過眼前最大的一道縫。
「頭兩年屋企人好反對，覺得我第一段婚姻失敗，揀人更要謹慎」。明白父母的苦心，但她更相信奇蹟。「我結過婚亦離過婚，對我嚟講婚姻唔係要着最靚嘅婚紗」。拍拖6年才第一次見家長，翌年子祺取得博士學位，找到研究工作，同年有情人終成眷屬。「離婚、病，好多人都遇過，都唔想俾人知，但唔講唔代表冇發生過，唔放棄就有機會翻身」。「只要愛得夠，年齡、學歷，背景差異，統統不是問題」子祺說。