唔少保險公司都有健康計劃，好似宏利個Manulife MOVE咁，一早請咗30歲出頭嘅周柏豪做代言人，sell年輕活力嘛。
不過，原來宏利高層都好有活力，佢哋亞洲總裁高瑞宏（Roy）身形同柏豪一樣咁fit，唔講唔知已經47歲。其實柏豪之前已經同阿Roy較量過，兩位上次即席鬥跑太空樓梯機，Roy滋油淡定下先輸咗3步。
噚日佢兩個再鬥踩健身單車機，Roy面不改容踩咗2,256米，後生過佢成廿年嘅柏豪都只係踩咗2,085米，Roy贏得輕鬆。原來，Roy以前游開水，10年前仲玩埋三項鐵人，𠵱家每日晨早5點起身仲會做1個鐘運動，唔贏就假啦。
宏利舉行呢次活動，主要係新出咗Apple Watch應用程式，會員每日行5,000至1萬步，嚟緊嗰年嘅保單會有5%至10%折扣。