陳宇琛(Sam)舊年7月同拍拖兩年多嘅有線前主播林佑蔚(Camille)求婚成功，婚禮預計喺今年年尾舉行，日前呢對準新人喺香港仔學整甜品過情人節，見到佢哋兩個全程sweet爆，差啲以為佢哋係已經結婚咗嘅新婚夫婦！講到婚禮籌備情況？阿Sam：「其實求婚係上年7月，不過一路忙緊工作，好似忘記咗要去註冊，直到今年年頭，有一日爹哋話我哋好似擺低咗件事，於是乎我哋咪嗱嗱聲入紙。」
雖然阿Sam同Camille都係喺外國讀書，本身性格鬼鬼地，不過佢哋都覺得結婚呢啲大事，一生人一次，希望做到最好，令大家留低最美好回憶：「o依家諗吓使唔使跟傳統儀式，跟住係擺酒嘅日子、地方，請乜嘢朋友，好多嘢要list，就算過程有啲繁複，話晒係喜事，一生一次係值得。但係我哋最着緊係雙方父母嘅諗法，要啲時間坐低慢慢傾。」
唔知嗲哋石修又有冇俾意見？阿Sam：「爹哋好開通，只要我哋開心就得，佢知道呢個時間我哋除咗籌備婚禮之外，工作上亦有好多嘢要面對，所以佢唔想額外俾壓力，等我哋兩個先去安排，去到某個時間先會俾意見，真係多謝佢！」講到有冇希望有一個夢想中嘅婚禮？Camille：「冇乜喎，我自己又冇乜fantasy，反而阿Sam會有，其實我哋性格有啲嘢係相反，對我嚟講，除咗父母同賓客開心之外，結婚後嘅生活先係最重要事。」阿Sam亦笑笑口話有啲嘢諗緊，但係要賣關子！
造人大計方面，阿Sam：「唔會即刻，呢方面有共識，我本身好鍾意小朋友，身邊好多朋友都做咗爹哋，不過都想過一兩年二人世界，順其自然喇！」至於工作方面，阿Sam年幾前成立咗一間production house，主力做event同拍廣告，不過今年有啲新搞作：「o依家傾緊大project，遲啲會同其他人合作拍電影同劇集，成事嘅話起碼要兩年時間先完成，o依家係新開始新挑戰，當然幕前都有做，希望兩樣兼顧！」
Camille亦有喺production house做嘢，同阿Sam兵分兩路處理公司事，笑稱佢哋係夫妻檔，阿Sam：「我哋係公私分明，我哋工作上並肩作戰，收工之後再做情侶。」Camille：「最初有啲客人唔知我拍拖，試過有人靜雞雞問。」
場地提供：Culinart