情人節講愛情，上集戀愛三代溝講咗2010後、80後、90後、60後嘅甜蜜愛情故事，不過，每段關係總有「然後，佢嬲咗我」嘅時候，究竟佢哋會為咗咩火都嚟埋？
1. 戀愛三代溝：對方電話幾多號？
80後阿Ming同90後Tracy拍拖兩年，點知阿Ming竟然寫錯Tracy嘅電話號碼，難怪Tracy火都嚟埋，「如果唔見咗部電話點算呢？有咩事點算呢？」唉，都係智能電話累事...相反，結咗婚37年、60後嘅葉生葉太就寫啱晒，葉生話以前就算係朋友或者客人嘅電話都記得，唔使睇電話簿！
2. 戀愛三代溝：最頂唔順對方嘅一件事
葉生一聽完條問題就話，「我驚張紙唔夠寫呀！」結果，佢寫咗相信係所有男人都頂唔順嘅三個字：「發脾氣！」葉生話：「女人發脾氣無理由o架！好似夜啲返屋企，都只不過係九點幾，都發脾氣！」葉太話佢會黑面，「早十年湊住啲小朋友好大壓力，好小事都發脾氣，o依家就少咗。」至於阿Ming同Tracy同居，Tracy話頂唔順阿Ming嗌極都唔起身搞到遲到，而阿Ming就好大膽爆Tracy私生活，話最頂唔順佢去廁所唔閂門，仲會寸佢：「咦？你又唔閂門呀？」Tracy話：「間屋得兩個人無乜所謂啦！」而上集講過2010年後、6歲嘅巧兒無心上人，只可以講下鍾意佢嘅男同學，佢話個男同學係全班最曳，「佢成日上堂都唔舉手就講嘢！」Birdly就話唔鍾意會打人嘅女仔。
3. 戀愛三代溝：點Check對方
葉生葉太拍拖嘅年代無GPS，唔容易check住對方喺邊，靠嘅只有電話。葉生話唔係返屋企打電話報到就得，「佢會打返返嚟，睇下我係咪用屋企電話打畀佢，所以o依家有飛線真係好呀！」不過，阿Ming話生活喺網絡發達嘅年代都要好小心，「Tracy會睇我facebook、ig呢啲，話我follow咗個女仔，like咗個女仔張相，我話只係like張相咋喎，佢都話唔得囉！」Tracy反駁，「嗰啲人唔識o架！」Ming反擊，「佢唔認識唧！係好耐無搵嘅朋友！」結果，Tracy以怒睥終結話題。
講返葉生葉太，葉生講得興起，仲自爆多兩段經歷。佢話有次拍拖睇完戲，送咗葉太返屋企，自己就去搵朋友。當佢落咗巴士一路行，總係覺得有人跟住，回望一次唔見有人，但係覺得唔對路，又向後望，就見到葉太喺後面。葉太大笑話，「我跟蹤佢，無理由咁早送我返屋企，應該有古怪！」
跟蹤嘅事，婚後又再發生。葉生自爆當時鍾意賭錢，為咗瞞住葉太去賭局，竟然同朋友夾計印假帖，話有人請佢哋飲滿月酒！葉生話：「嗰時葉太同朋友嘅老婆一齊送我哋去酒樓，我同朋友就喺後樓梯落返去，即刻截的士，點知上咗的士先見到佢兩個仲喺附近，斷正！」葉生話當時都唔知自己做緊乜，仲叫司機唔好理繼續開車。葉太話諗返都覺得好笑，笑住話：「無理由吖嘛，請飲點會唔請我哋，兩個嘢梗係有古怪，點知真係，見佢哋上的士，我哋咪又截一架喺後面追，去到重慶大廈咁啱紅燈，咪落車追上前，質問佢哋去邊囉！」佢哋一齊話，「當時真係好似拍戲咁！」
4. 戀愛三代溝：嬲到想分手？
葉生葉太都一齊話，「一定無，從來都無！」葉生承認試過好嬲，「嬲嗰刻宜得佢死添呀！不過事後就後悔，咪又氹返佢囉！」阿Ming都一樣，話從來無諗過分手，仲會唔要面咁氹返Tracy。反而Tracy話最激氣嗰時候有諗過，不過下咗啖氣又無咁做。聽到分手兩個字，2010年後嘅巧兒相當成熟咁話，「可以唔分手o架！如果你鍾意佢就唔使分手啦！」問到Birdly如果佢鍾意嘅Hanna鍾意咗第二個點算呢？Birdly即刻嘆口氣話，「我...我...我...我唔知呀...會痛痛地...個肚...個肚嘅外圍痛囉！」
5. 戀愛三代溝：仲會同EX聯絡？
Ming話知道Tracy同前度係有聯絡，都話介意嘅，不過相信佢哋只係朋友，所以唔刻意阻止，「如果好強硬話唔畀佢哋聯絡，咁有機會係佢話同朋友出去，其實係見前度，咁寧願佢坦白話畀我知。」葉生話識葉太前有一個心儀對象，不過後來無乜聯絡就不了了知，仲話：「雖然我係幾鍾意對方...咁但係...」葉太一聽到呢度就露出驚訝表情，問：「因咩事分手呀？」葉生都唔敢回望葉太，話：「可能見到你啦！」
雖然葉太無前度，不過葉生話就算葉太有，都會畀佢哋聯絡，「咁佢哋唔會做啲乜，我信得過佢唔會單獨約會，如果只係講下電話，食飯叫埋我一齊就無問題啦。」唔知葉太係咪嬲葉生話以前都幾鍾意前度，竟然反駁一句：「咁如果唔叫你呢？」葉生就不甘示弱，「唔叫我就你呃我！梗係唔接受啦！」葉太繼續講：「驚你唔鍾意吖嘛！」葉生一句k.o.：「你記得我下次都係咁對你就得o架喇！」好似小朋友咁鬥氣，葉生葉太最後都唔住大笑。
記者：鄒倩婷（阿仙）
攝影：峰、Neo
剪接：Roy
編審‧導演：陳家文