情人節最好做乜？對於趕住上市（IPO）嘅公司，當然係搵投資銀行做保薦人，即係行內所講嘅「IPO選美」啦。馬化騰旗下騰訊（700）計劃將內地最大網上文學平台「閱文集團」分拆在香港上市，聽講公司邀請咗多間外資投行今天去做pitching。
近年在香港上市嘅新股真係冇乜睇頭，2006、2007年內地多間巨頭企業來港上市嘅墟冚場面，好耐冇見，投資銀行亦冇乜大型IPO好爭，難得「股王」騰訊今次計劃將閱文集團分拆在港上市，多間外資投行都虎視眈眈。
香港人對於網上文學平台興趣一般，亦冇一個特別流行嘅平台，但內地就好興。閱文集團前身係「騰訊文學」，2013年成立，兩年後收購咗另一平台「盛大文學」，整合為閱文集團，成為內地最大網絡文學平台，旗下包括起點中文網、瀟湘書院、紅袖添香、QQ閱讀等品牌；擁有超過300萬冊圖書，近1億用戶，年收入廿億人仔㗎，集團係透過作者上載作品吸引用戶下載，從中收取費用。
按一般程序，如果騰訊呢個月為閱文敲定保薦人同包銷商，最快可能今年暑假之前已經可以上市，公司計劃集資62億元，如果市旺多人搶貨，分分鐘可以調高估值抽多啲水呀。