特首選舉提名期今日開始，獲中央力捧嘅前政務司司長林鄭月娥，政綱都仲未公佈，都已經拎夠票入閘。林太噚日響提名期前夕，搞咗場政綱第二「步」發佈會，公開部份政綱。林太話正式政綱要到提名期過晒，3月頭先有，不過為咗等多啲人認識佢，噚日出版為數12,000本，刊載佢舊照同背景資料嘅小冊子。唔少網民聽到都打個突，話睇緊嘅發佈會，原來係新書發佈會先啱。
講返本小冊子，林太競選口號雖然話就話「同行」，不過本書感覺就似獨行多過同行，個人獨照數目遠遠多過合照。有幸同林太合照嘅主角除咗佢家人，有一張係2013年同藝人劉松仁嘅相，林太特別提到，佢中七嗰年睇咗電視劇《北斗星》，深受劉松仁飾演嘅社工啟發，自己都想做社工。另一出奇嘅位，就係成本書出咗5張林太同家人嘅相，唔知點解偏偏冇一家四口嘅全家福。