八方相當年：
麥玲玲自爆細個係喊包 - 李八方

新年期間，大家可能見玄學家麥玲玲多過屋企人，而新正頭就見到玲玲師傅，確實係開心啲，皆因佢成日笑嘻嘻，成個「開心果」咁，點知玲玲師傅話，佢細個原來係喊包，「郁啲就喊㗎嘞」，係咪估大家唔到呢？
50歲嘅玲玲自爆細個好靜、甚少講嘢，大個啲先至多嘴咗，「細個仲好奀，直至小學先開始肥，幾乎每日一杯雪糕，同欣宜用鮑魚做零食有得揮。」就讀於英華女校嘅佢由細到大中文都好好，文學係至愛科目，作文好叻，攞過全級第一，佢覺得呢個強項令佢家陣上鏡讀稿都少咗難度，「語言嘅表達同文字都有啲相似」。
至於對玄學嘅喜好，宋韶光可能係啟蒙，佢話初中時見宋韶光喺電視講12生肖運程覺得好神奇，14、15歲開始睇風水書研究命理；其後喺收音機聽到風水家林真嘅節目，報讀佢嘅玄學班，「當時16歲、17歲，係班上最年輕學員。」佢話可能自己得意、笑容又好，就做埋入室弟子。

14歲自學風水命理

但1992年大專畢業後，無即刻入行就幫人睇相，結果去咗律師樓做秘書，「去律師樓嘅人，好多犯官非，有時贈佢兩句，佢哋就封返封利是仔畀我」，1996年起更轉型全職做風水師。佢1994年同學生何德結婚，玲玲話婚前算過老公嘅命格四平八穩，先安心下嫁，睇佢哋恩愛如昔，證明無算錯。