今晨（13日）沙田馬場來了一位武林高手，邊個高手敢嚟馬會踩場？咪就係曾繹演葉問一角嘅甄子丹，搞到今日晨課焦點落晒係呢位宇宙最強甄子丹身上。
原來佢晨咁早專程到場，主要原因為馬會拍攝稍後打吡大戰宣傳片。當拍攝完成後，甄子丹順便在大摩陪同下，觀看佢同老襟蔡加讚合夥持有的「宇宙車神」之操練情況。
甄子丹貴為國際巨星號稱宇宙最強，唔單止受到大摩熱情招待，就連騎練如蘇偉賢、李寶利、巴度均趁機搵佢合照集郵。須知同到宇宙最強合照，自己都與有榮焉！
巴度同李寶利均講過有睇荷李活電影《俠盜一號：星球大戰外傳》，所以知道甄子丹係邊個，並欣賞對方戲中精彩演出。
大摩對甄子丹解釋說：「『宇宙車神』上仗在洋紫荊短途錦標三級賽落敗，是因為馬兒氣管有血。目前牠的健康已回復正常。」
其間「宇宙車神」忽然發了一輪脾氣，甄子丹幽默地笑言，可能前一次「宇宙車神」贏馬時，佢冇入場拉頭馬，以致激嬲咗匹馬。而當「宇宙車神」在大圈操練完畢之後，大摩在另一邊踩單車回馬房，甄子丹則在大摩太太FiFi姐陪同下入馬房，繼續睇馬。