上星期長毛梁國雄聯同幾個自決派立法會議員喺立會大樓開記招，宣佈選特首，但事後俾人投訴話違反選舉規例，用公共資源搞選舉，立法會行管會噚日朝早就開會討論。
會後主席梁君彥話，由於立法會大樓設施屬公共資源，基於特首選舉期開始，決定由今日提名期開始直到選舉有結果，禁止議員利用立會大樓進行一切選舉活動，包括見候選人或者幫候選人宣傳，明顯衝住長毛上星期個記者會而來！
梁君彥又話，立會秘書處會就今次決定向議員發指引，希望議員能夠自律，仲講明若果有人違反指引不但會被警告，秘書處亦會報告畀選委會同廉政公署知！
眾所周知葉劉淑儀係其中一個參選人，咁搞法葉劉咪即係唔可以喺立會同記者講參選？咁其他政黨議員又可唔可以同記者講提名邊個參選人？長毛就話行管會決定合理，但最好講清楚乜嘢唔可以做。