鄭敬基（Joe）同黃寶欣當年憑一首《酒杯敲鋼琴》熱爆樂壇，兩人自始成為密友，面對逆境時都會義無反顧幫對方度過難關。佢哋日前接受訪問，除即場演繹惡搞版《酒杯敲你個頭》之外，仲細訴二十幾年前嘅往事。
傾訴秘密
Joe話當年去外地登台，衣食住行全部一齊，熟到可以傾訴秘密，佢話：「身邊老友都唔信我哋唔係情侶。」寶欣就話：「嗰陣如果有狗仔隊，我諗都會覺得我哋有啲嘢，我成日去佢屋企，佢彈結他，我唱歌，咁就一個晏晝。」寶欣乘機問Joe當年點解唔追佢？Joe搞笑話：「你啲腳趾好短！」
雖然做唔成情侶，但感情就好似家人，Joe自爆：「我第一個難關係婚姻失敗，令到我前妻好唔開心，走咗去佢（寶欣）屋企。」眼淺嘅寶欣諗起當時即喊：「收留咗佢（Joe前妻）一段時間，因為真係好friend，佢喊我就一齊喊，佢唔開心我就一齊唔開心。嗰段日子好難過，唔好話我幫過阿Joe，我淨係知道佢需要我嘅時候，我喺佢身邊。」
陪足七日
之後到寶欣婚變，Joe當然「擺渡人」上身，寶欣話：「我去多倫多搵佢，佢真係陪足我七日。因為佢嘅經歷，令到我都需要一個正確正面嘅思維，去處理我嘅事情。」做咗二十幾年老友，但寶欣話唔識點形容對方：「我知道佢係一個好好好嘅朋友，我就會全心全意支持佢。」
場地提供：Futurus Gourmet
撰文：馮仁昭