近排唔同股份loop住炒，又有二、三線陸續爆上，但慢升總好過快升，升得快就反映升市去到末段，豬都爭住要飛，可能係見頂時辰到。
H股指數最近強到爆錶，9日RSI升到81.9。過去一年H指試過3次9日RSI升高過80，3次都係再升一日就短線見頂，今次會唔會重複過去3次嘅魔咒？話唔埋，但至少第一個超買警號出咗嚟，蜜月期有可能去到尾聲，升埋今日無謂太冒險。小必駛得萬年船，如果未來一兩日加快搶升，主流股份可考慮減持食糊，將盈利袋住先。
以舊年年尾到而家，H指「升、橫行、升」嘅走勢，極似舊年英國脫歐公投後嘅7月初至8月中嘅「升、橫行、升」走勢，而當時8月中至8月尾整固，去到9月又快速爆升，中線升市先至完成，睇吓今次係咪相同玩法。如果係，大市需要先改善超買，等9日RSI去到50至60左右，整固完成後，可能仲有多一浸終極一升。多貨可以先減持觀望，睇定整固完成回升先再衝過。
路透引述內地一份政策文件草案顯示，中央治霾有大動作，正考慮要求鋼鐵和鋁廠進一步減產。其實消息出街時間係噚日下晝2時55分，港股仲未收市，但鋁股、鋼鐵股、煤炭股收市前冇動靜，新能源股朝早爆上之後，唔見得升幅擴大，按道理趁市好，利好消息有理冇理會挾升強勢股多一轉，睇吓今朝有冇遲來的終極一挾。
繼噚日兗煤（1171）之後，更強勢嘅中鋁（2600）都似要起動，1月下旬由3.5元三日爆上到4蚊，其後一路橫行，做旗形跌都唔願跌，上周四試過假突破，然後噚日再回升，似真係要挾多棍勁嘅。
晉佳
http://fb.com/advanceguy1