科大管理層噚日一年一度「大晒冷」見傳媒，仲用科大地標「火雞」祝大家講雞年快樂！不過，唔知一眾高層係咪有感科大男多女少，校方話今年要請多啲女性教職員，仲講明各學系如果物色到合適嘅女學者、科學家，校方會額外撥款請人，變相加多個教席。
首席副校長史維話想透過請多啲女士，為女同學樹立榜樣，鼓勵佢哋投身科研發展，仲透露科大「男女失衡」，「女性正教授比率才佔整體教授不足一成」，其中理、工學院情況最嚴重，女性教職員佔整個系都唔夠兩成。
史副校矢言目標係5至10年內，提升全校女性正教授比率到25% ，理學院、工學院女性職員比率就會提升到三成。八方就期待明年科大春茗嘅時候，全場科大管理層，唔只得一位女性啦！