今日係情人節，唔少中環靚女今日坐定定等收花，兼鬥吓邊個束花大。不過如果對方唔浪漫嘅話，唔好嬲住，可能唔浪漫就係做大官、步步高升嘅特徵，事關幾位財金阿頭，過情人節都係冇乜特別搞作嘅。
噚日特首候選人曾俊華同舊下屬、財經事務及庫務局局長陳家強同場出席金融服務界酒會，陳家強就話自己今晚會同太太一齊食飯，但係食group dinner喎。吓？咁有想像空間？可能係同埋囝囝、新抱一齊慶祝啩。
鬍鬚曾噚日朝早先俾曾太拍片，笑佢唔記得情人節係幾時，睇嚟佢今日冇藉口唔記得，乖乖哋交人陪曾太嘞。
港交所（388）行政總裁李小加，平時sell橋把口就浪過油，但佢其實都幾family man嘅，今日都係陪太太食飯，冇特別去邊度慶祝咁話。
反而噚日酒會搞手之一、證券商協會主席楊玳詩（Daisy），聽到情人節就擰擰頭，猛話自己好忙好忙。
金融服務界10個協會，齊齊舉辦新春酒會熱鬧吓，除咗平時見慣見熟嘅財金官員會畀面出席之外，今年仲適逢有特首選舉，本來4名候選人林鄭月娥、鬍鬚曾、葉劉淑儀、胡國興都應承嚟，但最後葉劉最早到、胡官第二、鬍鬚喺上水趕去中環所以遲到，林鄭連影都冇。金融服務界假假哋都有19票㗎喎，唔通已經數好晒，連選委都唔使再見？